image

PeyamaKurd - Hejmarek koçberên Kurd ên ji sînorê Belarusê vegeriyane Kurdistanê dibêjin, ew ji aliyê qaçaxçiyan ve hatine xapandin û ew bê xwarin û vexwarin di nava daristanan de mane.

Zîna Xelef ku xelka Şingalê ye û ji dema êrîşa DAIŞê ve ligel malbata xwe koçberî kampeke Duhokê bûbû, piştî ji ser sînorê Belarusê vegeriya ji K24ê re gotiye: “Qaçaxçiyan em xapandin. Wan got ku tenê 3 demjimêran em ê bigihin Polandayê, lê ne rast bû.”

Zîna Xelef dibêje: “Em 8 sal in wek koçber di bin konên kampê de dijînin. Me xwest em biçin Almanya, ji bo pêşeroja zarokên xwe dabîn bikin, lê qaçaxçiyan em xapandin. Em çend rojan di nava daristanên Belarusê de bê nan û av man û me 20 hezar Dolar jî zirar kir.”

Gewrê Osman jî pîrejineke Şingalî ye û ligel malbata xwe ji Belarusê vegeriyabû, dibêje: “Em 13 rojan li nava daristanan bê nan û av man. Zarokên me ji birçîbûn û sermayê westiyan.”

Hêjayî bibîrxistinê ye, 18ê Mijdara 2021ê, zêdetirî ji 400 koçberên Kurd û Ereb bi dilê xwe û bi hevahengiya Hikûmeta Herêma Kurdistanê û Hikûmeta Federalî ji Belarusê vegeriyan ku hîn jî pêvajoya vegera koçberan didome.